35° Città di Verona – Esordienti 2011
Provese – Villafranca
di Rodolfo Giurgevich

Sarà che l’era ‘na giornada de sole con ‘na nina de vento, ma go visto proprio ‘na bela partia.
Solo el campo non l’era mia masa per la quale, pì tera che erba ma quando te gh’è dies’ani no te vardi tanto se gh’è moio o se gh’è le buse, importante l’è zugar.

Provese – Villafranca: 0-3
(0-3) (0-2) (0-8)

Provese: Marigo, Zambon, Negretto, Ghiotto, Rexhai, Proietto, Marchina, Giammugnani,  Burato, Spinetti, Rapuano, Chen, Corsini, Marchetti.
Allenatore: Alessandro Calderara con Nicola Orlandi

Villafranca: Tentoni, Bovo, Coppini, Oliosi, Scattolini, Imperiale, Sambugar, Gelio, Melotto, Zanini, Topala, Tremante, Pelorosso, Taouik.
Allenatore: Franco Arcaro (no ghe giera) con Matteo Accordi

Arbitro: Nicola Lunardi di Prova

I parea indemonié i buteleti del Vilafranca, parchè no ‘l passa un minuto che i fa subito gol con Tremante (ma tremante de chè, iè i altri che i trema) che buta drento un balon arbinà da Sambugar (questo l’è proprio uno de noaltri, el core come ‘na moréciola) pecenin, ma tanto brao. El Tremante el fa ancora gol dopo diese minuti corendo drio a  ‘na bala che el so compagno Imperiale (ma senti che nomi che i gà ‘sti zugadori) la ga imbrocà longa.
L’è come un tiro a segno, parchè Taoufik (questo veronese no l’è, ma l’è el più brao de tuti) el senta a tirar in porta ma anca Gelio no’l se tira indrio par tirar come Sambugar  che a do minuti da la fine del tempo ‘riva in area col balon sui piè, el portiere Marigo para co la scarpa ma Taoufik el fa gol, zero a tri al primo tempo.
La partia pararia za finia, ma i buteleti de Calderara (el saria el mister, così se ciama ancò, de la Provese) i ciapa corajo e par diese minuti del secondo tempo i tien bota a quei de ‘l Vilafranca che i se sveja con Taoufik (‘sto l’è un fenomeno veramente, saria da comprar) con do gol, uno da lontan e ‘n altro giutà da Tremante.
Terso tempo no gh’è storia, oto gol par el Vilafranca la dise longa: i masena zugo e i segna tri volte Pelorosso (n’altro brao col balon fra i piè), do volte Gelio (che no l’è parente del Gelio grando che saria ora ch’el vaga in pension insieme al Segretario faso tuto mi), e dopo Tremante, Zanini e tanto par gradir, ancora, Taoufik.
I meio de la Provese iè stè i do portieri Marigo e Spinetti che i gà laorà assé, Rapuano, Marchetti, Negretto e anca el diese, Giammugnani.
L’arbitro che l’era un dirigente de la Provese, l’è stà brao, anca parchè i buteleti iè stà ‘tenti a no farse male, sensa darse pessatè su le caùcie.

 

Condividi anche tu!